Rom 2 | NdeIBE | STEP | Ngakho-ke kawulakho ukuxolisa wena owahlulela omunye, ngoba loba kungaphi owahlulela khona omunye, uyazigweba wena ngokwakho, ngoba wena owahlulelayo wenza izinto ezifanayo.

Romans 2

Ukwahlulela Okulungileyo KukaNkulunkulu

1 Ngakho-ke kawulakho ukuxolisa wena owahlulela omunye, ngoba loba kungaphi owahlulela khona omunye, uyazigweba wena ngokwakho, ngoba wena owahlulelayo wenza izinto ezifanayo. 2 Siyakwazi ukuthi ukubahlulela kwakhe uNkulunkulu labo abenza izinto ezinje kweyame eqinisweni. 3 Ngakho lapho wena, umuntu nje, ubahlulela kodwa usenza izinto ezifanayo, ucabanga ukuthi uzakubalekela ukwahlulela kukaNkulunkulu na?

4 Kumbe njalo weyisa ubukhulu bomusa wakhe, ukubekezela kanye lesineke, ungananzeleli ukuthi umusa kaNkulunkulu ukusa ekuphendukeni na?

5 Kodwa ngenxa yobuqholo bakho lenhliziyo yakho engaphendukiyo, uyaziqoqela ulaka oluzakuhlupha ngosuku lolaka lukaNkulunkulu, lapho okuzabonakaliswa khona ukwahlulela kwakhe okulungileyo. 6 UNkulunkulu “uzanika umuntu wonke ngokumayelana lalokho akwenzileyo.” 7 Kulabo abadinga inkazimulo, lodumo kanye lokungabhubhi, ngokuphikelela ekwenzeni okuhle, uzabanika ukuphila okulaphakade. 8 Kodwa labo abazinqinekelayo abala iqiniso balandele ububi, kuzakuba lolaka lokuthukuthela. 9 Kuzakuba lokuhlupheka losizi emuntwini wonke owenza okubi: kuqala kumJuda kulandele kowezizweni, 10 kodwa inkazimulo, lodumo kanye lokuthula kuye wonke owenza okulungileyo: kuqala kumJuda kulandele kowezizweni. 11 Ngoba uNkulunkulu kalabandlululo.

12 Bonke abenza isono ngaphandle komthetho bazabhubha ngaphandle komthetho, njalo bonke abenza isono ngaphansi komthetho bazakwahlulelwa ngomthetho. 13 Ngoba akusilabo abezwa umthetho abalungileyo emehlweni kaNkulunkulu, kodwa yilabo abalalela umthetho okuzathiwa balungile. 14 (Ngempela, uma abezizwe, abangelawo umthetho, besenza ngokwemvelo izinto ezifunwa ngumthetho, bangumthetho bona ngokwabo, lanxa bengelawo umthetho, 15 njengoba bebonakalisa ukuthi okufunwa ngumthetho kulotshiwe ezinhliziyweni zabo, izazela zabo ziyafakaza, imicabango yabo ibasola iphinde ibavikele.)

16 Lokhu kuzakwenzakala ngosuku uNkulunkulu azakwahlulela izimfihlo zabantu ngoJesu Khristu, njengokutsho kwevangeli lami.

AbaJuda LoMthetho

17 Khathesi-ke wena, uma uzibiza ngokuthi ungumJuda; uma uthembe umthetho njalo uzincoma ngobudlelwane bakho loNkulunkulu;

18 uma uyazi intando yakhe njalo uvumela okuhle ngoba ufundiswe ngumthetho; 19 uma ukholwa ukuthi ungumkhokheli weziphofu, ukukhanya kwalabo abasemnyameni,

20 umeluleki wezithutha, lomfundisi wezingane, ngoba kwezomthetho uhlanganisa ulwazi leqiniso 21 ngakho wena ofundisa abanye, kambe lawe kawuzifundisi na? Wena otshumayela ngokungebi, uyeba na? 22 Wena othi abantu bangafebi, uyafeba na? Wena owenyanya izithombe, uyawaphanga amathempeli na? 23 Wena ozincoma ngomthetho, uNkulunkulu uyamhlazisa ngokwephula umthetho na? 24 Njengoba kubhaliwe ukuthi: “Ibizo likaNkulunkulu lihlanjaziwe phakathi kwabezizwe ngenxa yakho.”

25 Ukusoka kuligugu uma ugcina umthetho, kodwa uma usephula umthetho, usube njengokungathi kawusokanga. 26 Uma labo abangasokanga begcina imfanelo zomthetho, kabayikukhangelwa njengabasokileyo na?

27 Lowo ongasokanga ngokwenyama kodwa elalela umthetho, uzakulahla wena, okuthi lanxa ulomlayo olotshiweyo njalo usokile, ungumephuli womthetho.

28 Umuntu kasumJuda nxa enguye emehlweni kuphela, loba esokile emehlweni lenyameni kuphela. 29 Hatshi, umuntu ungumJuda nxa enguye ngaphakathi, lokusoka yikusoka kwenhliziyo, ngoMoya, hatshi ngomlayo. Ukubongwa komuntu onjalo akuveli ebantwini, kodwa kuNkulunkulu.